ឯកឧត្តម ញ៉ែម វ៉ាន់នី បានដឹកនាំក្រុមការងារជួបសំណេះសំណាលជាមួយគណៈបញ្ជាការឯកភាពរដ្ឋបាលខេត្តព្រៃវែង និងចុះត្រួតពិនិត្យពន្ធនាគារខេត្តព្រៃវែង

នាថ្ងៃចន្ទ ១៤កើត ខែអស្សុជ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី៦ ខែតុលា ឆ្នាំ២០២៥

ឯកឧត្តម ញ៉ែម វ៉ាន់នី សមាជិក “គ.ជ.ប.ទ” ដោយអនុវត្តតាមការចាត់តាំងដ៏ខ្ពង់ខ្ពស់របស់ ឯកឧត្តម ប្រធាន “គ.ជ.ប.ទ” បានដឹកនាំក្រុមការងារជួបសំណេះសំណាលជាមួយគណៈបញ្ជាការឯកភាពរដ្ឋបាលខេត្តព្រៃវែង ដោយមានការចូលរួមពី លោក ពេជ្រ សុត្ថារ័ត្ន អភិបាលរងខេត្ត តំណាង ឯកឧត្តមអភិបាល នៃគណៈអភិបាលខេត្តព្រៃវែង លោកប្រធានពន្ធនាគារខេត្ត លោកស្នងការរង នៃស្នងការដ្ឋាននគរបាលខេត្ត លោក បញ្ជាការរង នៃបញ្ជាការដ្ឋានកងរាជអាវុធហត្ថខេត្ត រួមទាំងមន្រ្តីពាក់ព័ន្ធ ដើម្បីផ្តល់កិច្ចសហការល្អក្នុងការងារចុះត្រួតពិនិត្យកន្លែងដកហូតសេរីភាពក្នុងខេត្តព្រៃវែង រួមមាន ពន្ធនាគារខេត្ត ស្នងការដ្ឋាននគរបាលខេត្ត និងបញ្ជាការដ្ឋានកងរាជអាវុធហត្ថខេត្ត។

បន្ទាប់មក ឯកឧត្តម បានដឹកនាំមន្រ្តីនៃលេខាធិការដ្ឋាន ដើម្បីបើកកិច្ចត្រួតពិនិត្យពន្ធនាគារខេត្តព្រៃវែង។ ក្រៅពីជួបសំណេះសំណាលពិភាក្សាការងារជាមួយ លោកឧត្ដមអគ្គានុរក្សថ្នាក់លេខ២ ជួប សារីម ប្រធានពន្ធនាគារ និងមន្រ្តីពាក់ព័ន្ធ គណៈប្រតិភូ បានផ្សព្វផ្សាយអំពី តួនាទី ភារកិច្ចរបស់ គ.ជ.ប.ទ និងគោលការណ៍សិទ្ធិមនុស្សក្នុងការងារបង្ការ ទប់ស្កាត់ និងប្រឆាំងទារុណកម្ម និងអំពើមិនគប្បីគ្រប់ទម្រង់។ ឯកឧត្តម ក៏បានអញ្ចើញត្រួតពិនិត្យដោយផ្ទាល់នូវហេដ្ឋារចនាសម្ព័ន្ធ សម្ភារៈបរិក្ខារ ស្ថានភាពជនជាប់ឃុំ ស្ថានភាពមន្រ្តី និងជួបសម្ភាសន៍មន្រ្តី និងជនជាប់ឃុំ ដើម្បីស្វែងយល់ពីបញ្ហាប្រឈម លទ្ធផលសម្រេចបាននានារបស់ពន្ធនាគារ ហើយបានចែករំលែកបទពិសោធន៍ និងផ្ដល់អនុសាសន៍មួយចំនួនដល់មន្រ្តីពន្ធនាគារផងដែរ៕