ឯកឧត្តម កែវ តារាពង្ស បានដឹកនាំក្រុមការងារជួបសំេណះសំណាលជាមួយគណៈបញ្ជាការឯកភាពរដ្ឋបាលខេត្តកំពង់ចាម ដើម្បីផ្តល់ចុះអប់រំផ្សព្វផ្សាយនិងត្រួតពិនិត្យកន្លែងដកហូតសេរីភាពក្នុងខេត្តកំពង់ចាម រួមមាន ពន្ធនាគារខេត្ត ស្នងការដ្ឋាននគរបាលខេត្ត និងបញ្ជាការដ្ឋានកងរាជអាវុធហត្ថខេត្ត។

កាលពីថ្ងៃទី២៧-២៨ ខែមីនា ឆ្នាំ២០២៥ ដោយទទួលបានការចាត់តាំងដ៏ខ្ពង់ខ្ពស់ពី ឯកឧត្តម នុត សាអាន ប្រធានគណៈកម្មាធិការជាតិប្រឆាំងទារុណកម្ម “គ.ជ.ប.ទ” ឯកឧត្តម កែវ តារាពង្ស អនុប្រធាន “គ.ជ.ប.ទ”បានដឹកនាំក្រុមការងារជួបសំេណះសំណាលជាមួយគណៈបញ្ជាការឯកភាពរដ្ឋបាលខេត្តកំពង់ចាម ដោយមានការចូលរួមពី ឯកឧត្តមអភិបាលរងខេត្ត តំណាង ឯកឧត្តមអភិបាល នៃគណៈអភិបាលខេត្តកំពង់ចាម លោក អនុប្រធានពន្ធនាគារខេត្ត លោកស្នងការរង នៃស្នងការដ្ឋាននគរបាលខេត្ត លោក បញ្ជាការរង នៃបញ្ជាការដ្ឋានកងរាជអាវុធហត្ថខេត្ត តំណាងមន្ទីរសុខាភិបាល តំណាងមន្ទីរសង្គមកិច្ច អតីតយុទ្ធជន និងយុវនីតិសម្បទា តំណាងមន្ទីរកិច្ចការនារី រួមទាំងមន្រ្តីពាក់ព័ន្ធ ដើម្បីផ្តល់កិច្ចសហការល្អក្នុងការងារចុះអប់រំផ្សព្វផ្សាយ អំពីតួនាទី ភារកិច្ច របស់ គ.ជ.ប.ទ និងត្រួតពិនិត្យកន្លែងដកហូតសេរីភាពក្នុងខេត្តកំពង់ចាម រួមមាន ពន្ធនាគារខេត្ត ស្នងការដ្ឋាននគរបាលខេត្ត និងបញ្ជាការដ្ឋានកងរាជអាវុធហត្ថខេត្ត។

គោលបំណងនៃការចុះអប់រំផ្សព្វផ្សាយ និងត្រួតពិនិត្យនេះគឺដើម្បីបង្កើនការយល់ដឹងរបស់អាជ្ញាធរមានសមត្ថកិច្ចលើលិខិតបទដ្ឋានគតិយុត្តពាក់ព័ន្ធ ពង្រឹងការគោរពសិទ្ធិជនដែលអាច ឬត្រូវបានដកហូតសេរីភាព និងធានាថាប្រព្រឹត្តកម្មរបស់អាជ្ញាធរលើជនទាំងនោះស្របតាមលិខិតបទដ្ឋាន គោលការណ៍ជាធរមាន។ ជាមួយគ្នានេះដែរ មន្រ្តីអនុវត្តច្បាប់ក៏ត្រូវបានលើកកម្ពស់ និងគាំពារក្នុងការអនុវត្តតួនាទីរបស់ខ្លួន។

ឯកឧត្តមប្រធានក្រុមការងារ បានស្វែងយល់អំពីបញ្ហាប្រឈមនានានៅតាមបណ្តាកន្លែងដកហូតសេរីភាពក្នុងខេត្ត ហើយបានចែករំលែកបទពិសោធន៍ និងផ្ដល់អនុសាសន៍មួយចំនួនដល់មន្រ្តីគ្រប់គ្រងកន្លែងដកហូតសេរីភាពទាំងនោះផងដែរ៕