ឯកឧត្តម នុត សត្យា បានដឹកនាំក្រុមការងារចុះត្រួតពិនិត្យពន្ធនាគារខេត្តបន្ទាយមានជ័យ និងស៊ើបអង្កេតករណីសង្ស័យមានអំពើមិនគប្បីលើជនជាប់ឃុំ។

កាលពីថ្ងៃទី២៤-២៥ ខែមីនា ឆ្នាំ២០២៥ ដោយទទួលបានការចាត់តាំងដ៏ខ្ពង់ខ្ពស់ពី ឯកឧត្តម នុត សាអាន ប្រធានគណៈកម្មាធិការជាតិប្រឆាំងទារុណកម្ម “គ.ជ.ប.ទ” ឯកឧត្តម នុត សត្យា ប្រធានលេខាធិការដ្ឋាន គ.ជ.ប.ទ បានដឹកនាំក្រុមការងារចុះត្រួតពិនិត្យពន្ធនាគារខេត្តបន្ទាយមានជ័យ និងស៊ើបអង្កេតករណីសង្ស័យមានអំពើមិនគប្បីលើជនជាប់ឃុំ។

គោលបំណងនៃការចុះ ត្រួតពិនិត្សនិងស៊ើបអង្កេតនេះគឺដើម្បីពង្រឹងការគោរពសិទ្ធិជនដែលត្រូវបានដកហូតសេរីភាព និងធានាថាប្រព្រឹត្តកម្មរបស់អាជ្ញាធរលើជនទាំងនោះស្របតាមបទដ្ឋានគតិយុត្ត និងគោលការណ៍ជាធរមាន។ ជាមួយគ្នានេះដែរ មន្រ្តីអនុវត្តច្បាប់ក៏ត្រូវបានលើកកម្ពស់ និងគាំពារក្នុងការអនុវត្តតួនាទីរបស់ខ្លួន។

ឯកឧត្តមប្រធានក្រុមការងារ បានស្វែងយល់អំពីបញ្ហាប្រឈមនានារបស់ពន្ធនាគារ និងស្ថានភាពជាក់ស្តែងរបស់ជនជាប់ឃុំ ហើយបានចែករំលែកបទពិសោធន៍ និងផ្ដល់អនុសាសន៍មួយចំនួន៕