ឯកឧត្តម នុត សត្យា បានដឹកនាំក្រុមការងារចុះត្រួតពិនិត្យកន្លែងដកហូតសេរីភាពក្នុងខេត្តបន្ទាយមានជ័យ រួមមាន ស្នងការដ្ឋាននគរបាលខេត្ត បញ្ជាការដ្ឋានកងរាជអាវុធហត្ថខេត្ត។

កាលពីថ្ងៃទី២៥ ខែមីនា ឆ្នាំ២០២៥ ដោយទទួលបានការចាត់តាំងដ៏ខ្ពង់ខ្ពស់ពី ឯកឧត្តម នុត សាអាន ប្រធានគណៈកម្មាធិការជាតិប្រឆាំងទារុណកម្ម គ.ជ.ប.ទ ឯកឧត្តម នុត សត្យា ប្រធានលេខាធិការដ្ឋាន គ.ជ.ប.ទ បានដឹកនាំក្រុមការងារចុះត្រួតពិនិត្យកន្លែងដកហូតសេរីភាពក្នុងខេត្តបន្ទាយមានជ័យ រួមមាន ស្នងការដ្ឋាននគរបាលខេត្ត បញ្ជាការដ្ឋានកងរាជអាវុធហត្ថខេត្ត។

គោលបំណងនៃការចុះត្រួតពិនិត្យនេះគឺដើម្បីបង្កើនការយល់ដឹងរបស់អាជ្ញាធរមានសមត្ថកិច្ចលើលិខិតបទដ្ឋានគតិយុត្តពាក់ព័ន្ធ ពង្រឹងការគោរពសិទ្ធិជនដែលអាច ឬត្រូវបានដកហូតសេរីភាព និងធានាថាប្រព្រឹត្តកម្មរបស់អាជ្ញាធរលើជនទាំងនោះស្របតាមលិខិតបទដ្ឋាន គោលការណ៍ជាធរមាន។ ជាមួយគ្នានេះដែរ មន្រ្តីអនុវត្តច្បាប់ក៏ត្រូវបានលើកកម្ពស់ និងគាំពារក្នុងការអនុវត្តតួនាទីរបស់ខ្លួន។

ឯកឧត្តមប្រធានក្រុមការងារ បានជួបសំណេះសំណាល ពិភាក្សានិងចែករំលែកបទពិសោធន៍ និងស្វែងយល់អំពីបញ្ហាប្រឈមនានារបស់មន្រ្តីអនុវត្តច្បាប់ ក្នុងស្នងការដ្ឋាននគរបាលខេត្ត និងបញ្ជាការដ្ឋានកងរាជអាវុធហត្ថខេត្ត។ ជាកិច្ចបញ្ចប់ ឯកឧត្តមប្រធានក្រុមការងារ បានផ្ដល់អនុសាសន៍ជាបឋមមួយចំនួន ជូនគណៈដឹកនាំនៃអង្គភាពទាំងពីរ ដើម្បីពិនិត្យ ពិចារណាកែសម្រួលនិងអនុវត្ត។